MILLIY URF-ODATLARIMIZDAN:KO’PKARI

Ko’pkari – bu chavandozlar bahsi. Ota-boblarimiz go’daklikdan bolalaik fasliga kirgan farzandlarining qo’lini halollash, bo’y yetgan qizlarni uzatish, yigitlarni uylantirish to’ylarida xalqqa osh berib, so’nggida ko’pkari bahsi tomoshalarini ko’rsatishgan.

Ko’pkari – bu chavandozlik, ot ustida ommaviy musobaqa shartlarini bajarib, g’olib chiqish uchun olib boriladigan kurash jangidir. Ko’pkarining nomini uloq ham deyishadi.

Ko’pkari bahsida so’yilgan uloq (echki bolasi)tanasi to’y – musobaqa hakamlari tomonidan o’rtaga tashlanib, ushbu kurash shartlari ana shu uloq bilan bog’liq holda bajariladi.

Ko’pkari asosan yakka bahs. Musobaqa sharti o’rtaga tashlangan uloq tanasini taqimga (chavandoz soni bilan arg’umoq sag’risi orasida) qisib, maydonni gir aylantirgancha, belgilangan manzilga – uloq kayvoni hakam yoniga birinchi bo’lib keltirib tashlash.

Ko’pkarida ot egasi poygaga tushishi ham mumkin, tushmasligi ham mumkin. Chavandozlar keksayganlarida, uloqqa o’zlari turli sabablarga ko’ra tusholmasligi sababli ko’pkari shartlariga tayyorlangan “aqlli”, “tajribali” otlarini yosh chavandozlarga “kira”ga beradilar. Bu o’rinda ham g’olib chiqqan arg’umoq g’ayratli chavandozi bilan ot egasi mukofotni bo’lib oladilar.

Mustaqillikka erishganimizdan so’ng asriy an’analarimiz qatorida ko’pkari ham qayta tiklandi. Turli bayram, to’y – xashamlar, xalq sayillarida ot choptirib, uloq uchun kurashayotgan vatandoshlarimiz ko’pchilikni tashkil etadi. Uloq ko’pkari bo’yicha O’zbekiston chempionati tashkil qilindi. Qo’shni davlat chavandozlari o’rtasida turli musobaqalar o’tkazilmoqda.